_._22CONCORSO M

mai

Mailing List Histria concorso 2013 - elementari

Lavori di gruppo

 

2° PREMIO

Motto ASTA E FILETO      

            
                                   
Classe I: Olivo Meriani Merlo, Ryan Vižintin, Lara Ponjavić,                                            
 
Classe II: Lorenzo Persel    -   Classe III: Rocco Smoković

                                                                            Scuola Elementare Italiana “Edmondo De Amicis” Buie                                                    

                                                                                  Insegnante: Katia Šterle Pincin
 

Motivazione: Vestiti i panni di intervistatori, bimbi di oggi fanno ritornare sui banchi di scuola i loro nonni, in una rievocazione a tratti sorridente, a tratti commossa, del tempo che fu, utilizzando il colorito dialetto che unisce le generazioni.

 

I NONI A SCOLA

I nostri noni senpre i ne dişi „beati voi che ogi gavè solo de andar scola“, „mama mia quanti libri che ti ga in sta borsa“, „ma cosa te servi la pena scancelabile?“, „tu mama ancora un poco la te menarà fino in clase col auto“... 

     Parlando con la mestra gavemo capì che duti i noni i ripeti senpre le stese parole e alora ghe gavemo dimandà come che ghe jera lori a scola e gavemo trovà tante robe interessanti...

OLIVO E NONA MARIA

Olivo: „Nona Maria, ti ti ga tanti ani, ma ti te ricordi de quando ti jeri picia e ti andavi a scola?“

Nona Maria: „Sì, me ricordo, perché le mestra, i compagni e i şioghi de una volta no se dişmentiga mai!“

Olivo: „Contime nona, dai!“

Nona Maria: „Va ben, te conto subito una roba che par sempre ricordarò. De picia jero magra come un stechin. Ala matina, durante la ricreasion, la maestra me preparava el şavajon che saria el şialo de l' ovo şbatù col sucaro, parché 'l xe sai nutriente. Quanto ben che ghe volevo ala mia mestra! Me ricordo ancora el suo cognome: Fucich. Ieri, come ogi, le mestre xe come le seconde mame.“

Olivo: „E in şaino nona, ti gavevi anche ti, quaderni, matite, colori come mi?“

Nonna Maria: „No esisteva i şaini colorai come deso con duti sti pupoloti... Gaveimo la borsa e drento jera solo un quaderno sotil sotil, un libro de letura e un penariol de legno.“

Olivo: „Ma cosa xe sto penariol????“

Nona Maria: „E, caro mio, no esisteva pene ne penarei come ogi. Gaveimo una pena de legno e in sima la gaveva un penin che bisognava tociar in tel' inchiostro del calamaro par poder scrivar. Ogni şiorno vignivo caşa con le man dute luride.“

Olivo: „Calamaro? Mai sentì“

Nona Maria: „Jera una specie de bicerin fisà sul banco e dentro jera inchiostro!“

Olivo: „Che ridar nona! Penso propio ch' le pene de ogi xe più pratiche!“

Nona Maria: „E,sì, ma col penin faseimo ben i esercişi de asta e fileto!“

Olivo: „Asta e fileto?!?“

Nona Maria: „Sì, prima de poder scrivar le prime parole e i primi numari faseimo tante pagine piene de segni .“

 

Foto3

 

Olivo: „ Uff, mi no gavaria tanta pasiensa... E dime nona ancora che şioghi fasevi?“

Nona Maria: „Faseimo el şirotondo, şiogaimo a „porton“, a „corerse drio“, a „sconderse“, e anche a „le bele statuine“. Pochi şiogatoli, ma tanta fantasia!“

Olivo: „Graşie nona.“

 

ROCCO E NONO FABIO

Rocco: „Nono, contime come jera a scola quando ti jeri come mi?“

Nono Fabio:  „Mi andavo in scola crovata nel 1949, quela volta doveimo andar in scola crovata per motivi politici. Mia mare no saveva crovato, mio pare ancora meno. No savevo la lingua e per quel gavevo problemi. Me piaşeva sai el sport, fasevo cros, ma el libro propio no. El professor Jura voleva che vago studiar par maestro de ginastica. Go ripetù la quarta; gavevo dieşe uni, ma sinque de ginastica.  Una volta jera più severità e disiplina, più rispeto par i mestri.

La scola media la go fata a Parenso dal 1958 al 1962 e go finì par perito tecnico de agricoltura.“

Rocco: „Ma gaveivo şaini, matite, pene???“

Nono Fabio: „Le borse par i libri jera con la manişa. Chi no gaveva el temperamatite, usava el britolin. Tociaimo le pene in tel' inchiostro.“

Rocco: „Cosa magnaivo par marenda?“

Nonno Fabio: „A scola i ne dava late in polvere e formagio merican. No esisteva le coghe.“

Rocco:“Go capì, graşie nono, go capì perché ti me dişi senpre: ma cosa ti se lamenti...e se ti savesi come jera una volta... “

 

LORENZO E NONA LIVIA

Lorenzo:“Nona, contime de quando ti ieri picia e che ti andavi a scola.“

Nona Livia:“ Mi andavo a scola a Vartanejo e go scominsià nel 1942. Quela volta la scola durava 5 ani. La matina Scominsiaimo alle 8.00 e a meşogiorno andaimo a caşa. Sirca ale dieşe Jera la ricreasion in tela corte dela scola. Durante la ricreasion şiogaimo a nascondin, a ciaparse o con una bala fata de stofe cuşide insieme e con un cor de semola.

La lingua che se imparava jera 'l talian. Le clasi jera miste e numeroşe (fina a 30 fjoi). Me ricordo che gaveimo talian, conti e religion. In clase doveimo gaver el grembiul nero col coleto bianco.

La merenda la portaimo de caşa: pan e marmelata, pan e una fetina de paneto de fighi o un rapo de ua. „

Lorenzo: „ Gaveivo libri e quaderni?“

Nona Livia:“Portaimo a scola do libri e do quaderni ligai con un lastico. Qualchedun gaveva la borsa de stofa.“

Lorenzo:“ E come andaivo a scola?“

Nona Livia:“ Fino a scola e indrio andaimo a pie.“

Lorenzo:“ No poso credar, ma gaveivo almeno matite e quaderni?“

Nona Livia:“Scriveimo con la matita o con un penin che tociaimo in tel' inchiostro. Ogni banco gaveva un buşo dove se meteva una boceta de inchiostro. In aula jera una lavagna girevole che de una parte la gaveva le righe e de l' altra i quadratini.“

Lorenzo:“ Ti gavevi una mestra o un mestro?“

Nona Livia:“ Gavevo una mestra e dopo un mestro, duti e do sai severi. Una volta jera sai punisioni e castighi: col venco i ne dava par la man, doveimo inşenociarse sul sal, andar in castigo drio la lavagna e dopo quando vegniimo caşa ghe ne becaimo del pare. 

El primo ano de scola se impiniva pagine e pagine de asta e fileto parché doveimo gaver una bela scritura.

Durante l'ano studiaimo a memoria tante poesie e dopo le recitaimo al spetacolo de fine ano.“

Lorenzo: „Nona, andaivo almeno in gita come noi?“

Nona Livia:“Non andaimo in gita, esisteva solo la colonia estiva par i fioi che el dotor giudicava più deboli de salute.“                                                                                                     

Lorenzo:“ E dopo noi se lamentemo... grazie nona!“

 

 

 

 

 

  

 

 

 

 

 

 

 

 

RYAN E NONA JELENA

Ryan: „Nona, contime de quando ti andavi a scola...“

Nonna Jelena: „Mi andavo a scola nei anni 60. In classe jerimo sirca in 25 fioi. I mestri jera sai severi e ogni şiorno i ne meteva in castigo: i ne tirava le recie e i cavei, i ne meteva in canton e doveimo scrivar tante volte la stesa roba. El mestro usava el righel come bacheta.

Non gaveimo la marenda calda come voi ogi. Tuti gaveimo paura dei mestri.

Uşaimo el grembiul blu con el coleto bianco. In clase jera una lavagna granda verde o blu e se scriveva col geso. Par scaldarse a scola jera le stuve a legni e l'alun de servisio doveva portar i legni in clase e sonar el campanel. A scola andaimo a pie. Gaveimo la cartela o la borsa a tracola. Quando tornaimo caşa no gaveimo tanto tenpo par far la lesion parché doveimo andar lavorar in campagna.“
 

RYAN:“ No jera fasile per voi nona, deso vedo come ga cambià i tempi!"            

LaRA E NONNA FIORELA

Lara: „Nona, contime de quando ti andavi scola, come jera?“Nonna Fiorela: „Mi andavo a scola in Terre Bianche, visin Crassiza. La scola jera sul montisel e andavo senpre a pie. Drio la scola jera un grando pra dove şiogaimo. La mia mestra se ciamava Fides e la ne imparava a ricamar, cantar e resitar. Gavevo la borsa rossa, do quaderni e do libri; un de crovato e uno de conti. A scola gaveimo el grembiul blu con el coleto bianco.“ 
Lara:“ Anche mi volesi el grembiul!!!“